Dopo Brad Pitt, Angelina Jolie e Leonardo Di Caprio, è invasione! I numerosi studi notarili di città e provincia non riescono a far fronte allo strabiliante numero di richieste di rogito da parte del jet set di mezzo mondo.
Le testimonianze sono state raccolte dal nostro inviato nei bar e nelle osterie e sono riportate testualmente."Sul monte Baldo è sta visto el famoso cantante americàn Bob Dylan, che, come tuti i sà, l'è un po' orso. Par che el s'àbia inamorà de un rifugio, I Fiori del Baldo, che zà l'è tegnùo da n'altro orso".
"A Sant'Ana Jack Nicholson el s'à comprà le cave che gh'è soto el monte Loffa. I dise che el vol far un film su la disperasiòn dei postini, ma gh'è tuto soto segreto".
"Anca in Valpantena gh'è movimento. I ha visto la Lady Gaga, che l'è na butela pitosto fineta, giràr da le parte de Rosaro in serca de qualche vecio capanòn par i piti, parchè la vol farse el so bel loft con vista sui capanoni de marmi sparpaiè in giro par tuta la Valpantena".
"In Valpolesela ghe n'è tanti de atori famosi, ma i vien solo in piena stagiòn par farse i fumi a maca quando i bacani i spiansa le vegne".
"Sul lago i vigili no i è boni de tegnerghe drio a tuti i atori tedeschi de Rex, de Derrick, de Siska e del Cobra, che i vol a tuti i costi torse na casa sul coletòr de le fogne, parchè i ga contà che l'aria e l'acqua che ghe lì le fa guarir anca dai ani che passa".
"A Verona va forte anca la Zai. Par che i cinesi i sia drio compràr tuti i loti de tera atorno al parchegio de la fiera e se pol anca capirli, parchè lori no i à gnanca mai visto tanto largo par gnente".
"No stemo parlar de le basse. A Isola gh'è più giaponesi che no fa a Tokio. El riso con le anguile el va a la grande e i g'à dato da intendar che un poca de diossina la fa giusto ben par purgarse da le radiasioni de Fukushima ".
"A Lavagno gh'è la fila de miliardari veci stracampii che speta l'ospedàl de don Verzè par tiràr avanti fin a cento e vinti e passa ani. Special guest del ricovero, ma sarèa più giusto ciamarlo museo, l'è Silvio Berluskhan, che come teatrante l'è sta de sicuro el meio de la coà".
