Verona, i la sta mandando in mona

 

     Ma...viènlo istesso?

Se Gesù bambin volesse

nassar qua in de sta cità,

g'ò paura che 'l poarìa

incontrar difficoltà...

Sul musseto San Giuseppe,

e la Madonna col so velo,

par scapàr lontan da Erode

i vien qua col saco a pelo...

Ma qua el Sindaco ha za dito

che i pitochi no 'l le fila,

che qua dentro l'è gradito

sol ci riva con la pila!

Se nel traffico i se perde

par ragiungiar ben la stela,

prima o dopo sèrto i cata

qualche multa che le pela...

Se a un albergo i se rivolge

anunciandoghe al paron:

"Presto arriva el Salvatore..."

"Via, via! No! N'antro teron?!"

E se i vol sponsàr un poco

destirà su na panchina,

gh'è na sbara de traverso

che la schena ghe sassìna...

Se lì arente al Municipio

co un panin serca ristoro,

i le cassa via de bruto

co la scusa del decoro!

Se i se porta un par de bestie

par scaldarse fora un po'...

"No! - i ghe dise - gh'è za pien

qua de aseni e de bo!"

E se po' una mangiatoia

i se prepara da par lori,

i le cata dopo un poco

tuta piena de Assessori...

E pensàr che ogni momento

qua i se vanta con calor,

e i ne conta che Verona...

la cità l'è de l'Amor!

No ghe crede mìa nessun

a sto nome che i g'à messo...

ma te prego, Buteleto:

par piaser... dai, vien istesso!

 

UN ANNO IN RIMA

Roberto Puliero

delmiglio editore